விழுப்புரம் பழைய நகராட்சி பூங்காவில் அநாகரீக செயல்களில் ஈடுபட்டு வந்த பள்ளி மற்றும் கல்லூரி மாணவர்களைக் காவல்துறையினர் எச்சரித்து அனுப்பிய சம்பவம் அப்பகுதியில் வரவேற்பைப் பெற்றுள்ளது.
விழுப்புரம் நகரின் முக்கியப் பொழுதுபோக்கு இடமாகவும், முதியவர்கள் நடைபயிற்சி மேற்கொள்ளும் இடமாகவும் விளங்கும் பழைய நகராட்சி பூங்காவில், கடந்த சில நாட்களாக பள்ளி மற்றும் கல்லூரி மாணவர்கள் வகுப்புகளைப் புறக்கணித்துவிட்டு அநாகரீக செயல்களில் ஈடுபட்டு வருவதாகப் பொதுமக்கள் புகார் அளித்திருந்தனர். இதனால் நடைபயிற்சிக்கு வரும் பொதுமக்கள் கடும் சிரமத்திற்கு உள்ளாகினர்.
இதனைத் தொடர்ந்து, காவல்துறையினர் பூங்காவில் திடீர் ஆய்வு மேற்கொண்டனர். அப்போது அங்கு தேவையின்றி சுற்றித் திரிந்த மாணவ, மாணவிகளை எச்சரித்த அதிகாரிகள், அவர்களின் பெற்றோர்களுக்கும் மற்றும் கல்வி நிறுவனங்களுக்கும் தகவல் தெரிவித்தனர். மேலும், பூங்காவில் தொடர்ந்து கண்காணிப்புப் பணிகளை மேற்கொள்ள ரோந்துப் போலீசாருக்கு உத்தரவிடப்பட்டுள்ளது.
காவல்துறையின் இந்த உடனடி நடவடிக்கையால் பூங்கா தற்போது அமைதியான சூழலுக்குத் திரும்பியுள்ளது. பொதுமக்களின் புகாரை ஏற்று விரைந்து செயல்பட்ட காவல்துறையினருக்கு சமூக ஆர்வலர்களும், நடைபயிற்சி மேற்கொள்வோரும் பாராட்டு தெரிவித்துள்ளனர்.