இசையமைப்பாளர், நடிகர் மற்றும் இயக்குநரான ஹிப்ஹாப் தமிழா ஆதி நடித்துள்ள 'மீசைய முறுக்கு 2' திரைப்படத்தின் ரிலீஸ் தேதி அதிகாரப்பூர்வமாக அறிவிக்கப்பட்டுள்ளது. ரசிகர்கள் நீண்ட நாட்களாக எதிர்பார்த்த இந்த அறிவிப்பை ஆதி தனது சமூக வலைதளப் பக்கங்கள் மூலம் வெளியிட்டுள்ளார்.
2017-ஆம் ஆண்டு வெளியாகி இளைஞர்களிடையே பெரும் வரவேற்பைப் பெற்ற 'மீசைய முறுக்கு' திரைப்படத்தின் தொடர்ச்சியாக உருவாகியுள்ள இந்தப் படம், வரும் செப்டம்பர் 25, 2026 அன்று உலகம் முழுவதும் திரையரங்குகளில் வெளியாக உள்ளது. வெளியீட்டு தேதியுடன் வெளியிடப்பட்ட சிறப்பு வீடியோ ரசிகர்களிடையே அதிக எதிர்பார்ப்பை ஏற்படுத்தியுள்ளது.
அந்த அறிவிப்பு வீடியோவில், ஆதி நடித்துள்ள கதாபாத்திரம், "ஜெயிப்பேனா, தோற்பேனா என்பது முக்கியமில்லை... கடைசி வரை போராடுவேன்" என்ற கருத்தை வெளிப்படுத்தும் வசனத்துடன் தோன்றுகிறது. மேலும், "திரையரங்கில் ஒரு இசை விழாவுக்கு தயாராகுங்கள்" என்ற வாசகமும் இடம்பெற்றுள்ளது. இதன் மூலம், முதல் பாகத்தைப் போலவே இசைக்கும், இளைஞர்களின் வாழ்க்கைப் பயணத்திற்கும் முக்கியத்துவம் அளிக்கும் கதையாக படம் உருவாகியிருப்பது தெரியவந்துள்ளது.
இந்தப் படத்தில் ஹிப்ஹாப் தமிழா ஆதி மட்டுமல்லாமல், சைத்ரா ஆச்சார், கேதிகா சர்மா, ரம்யா ரங்கநாதன், நாசர், ஆடுகளம் நரேன், கருணாஸ், ஷா ரா, ஹர்ஷத் கான் உள்ளிட்ட பலர் முக்கிய கதாபாத்திரங்களில் நடித்துள்ளனர். இயக்கம், திரைக்கதை, இசை மற்றும் பாடல்களை ஹிப்ஹாப் ஆதி கவனித்துள்ள நிலையில், கூடுதல் வசனங்களை கரண் கார்க்கி மற்றும் நிதிஷ் டி. எழுதியுள்ளனர்.
முதல் பாகம் இசை, நட்பு, காதல் மற்றும் கனவுகளை மையமாகக் கொண்டு ரசிகர்களிடம் தனி இடம்பிடித்திருந்தது. அதே உணர்வுகளை மேலும் விரிவுபடுத்தும் வகையில் இரண்டாம் பாகமும் உருவாகியிருப்பதாக படக்குழு தெரிவித்துள்ளது. வெளியீட்டு தேதி அறிவிக்கப்பட்டுள்ளதால், படத்தின் டிரெய்லர், பாடல்கள் மற்றும் புரமோஷன் நிகழ்ச்சிகள் விரைவில் வெளியாகும் என ரசிகர்கள் எதிர்பார்த்து வருகின்றனர்.