டாஸ்மாக் கடைகளில் புதிய இறக்குமதி மது, பீர் அறிமுகம்!

# டாஸ்மாக் கடைகளில் பெரிய மாற்றம்: அதிக இறக்குமதி மது, பீர் வகைகள் அறிமுகம்! தமிழகத்தில் டாஸ்மாக் கடைகளின் செயல்பாட்டில் முக்கிய மாற்றங்களை கொண்டு வர மாநில அரசு திட்டமிட்டுள்ளது. இதன் ஒரு பகுதியாக, அடுத்த ஆறு மாதங்களில் அதிகளவிலான புதிய மற்றும் இறக்குமதி செய்யப்பட்ட மது, பீர் பிராண்டுகளை அறிமுகப்படுத்த நடவடிக்கை எடுக்கப்பட்டுள்ளதாக தகவல் வெளியாகியுள்ளது. தற்போது தமிழகத்தில் கிடைக்காத பல பிரபலமான தேசிய மற்றும் சர்வதேச பிராண்டுகளை டாஸ்மாக் விற்பனை பட்டியலில் சேர்க்க அதிகாரிகள் ஆலோசனை நடத்தி வருகின்றனர். புதுச்சேரி மற்றும் பெங்களூரு உள்ளிட்ட பகுதிகளுக்கு சென்று மது வாங்கும் பழக்கத்தை குறைத்து, அந்த வருவாயை தமிழகத்திற்குள் தக்கவைத்துக் கொள்வதே இந்த நடவடிக்கையின் முக்கிய நோக்கமாக கூறப்படுகிறது. மேலும், தற்போதுள்ள டாஸ்மாக் கடைகளின் கட்டமைப்பையும் மேம்படுத்த திட்டமிடப்பட்டுள்ளது. சுமார் 250 சதுர அடி பரப்பளவில் இயங்கும் பல கடைகள், 500 சதுர அடி வரை விரிவுபடுத்தப்படலாம் என்றும், கடைகளில் வாடிக்கையாளர்களுக்கான வசதிகள் மற்றும் சேமிப்பு கட்டமைப்புகள் மேம்படுத்தப்பட உள்ளதாகவும் கூறப்படுகிறது. முதற்கட்டமாக, உயர்தர வாடிக்கையாளர்களுக்கான எலைட் (Elite) டாஸ்மாக் கடைகளில் புதிய இறக்குமதி மது மற்றும் பீர் வகைகள் அறிமுகப்படுத்தப்பட உள்ளன. பின்னர் அவை பொதுவான டாஸ்மாக் கடைகளுக்கும் விரிவுபடுத்தப்படும் என அதிகாரிகள் தெரிவித்துள்ளனர். தமிழகத்தில் மது விற்பனை வருவாயை அதிகரிப்பதோடு, வாடிக்கையாளர்களுக்கு கூடுதல் தேர்வு வாய்ப்புகளை வழங்கும் நோக்கில் இந்த மாற்றங்கள் மேற்கொள்ளப்படுவதாக தகவல்கள் தெரிவிக்கின்றன.