மதுரை மாவட்டம் மேலூர் அருகே உள்ள தனியாமங்கலம் பகுதியில், காணாமல் போன ஏழு வயது சிறுவன் சடலமாக மீட்கப்பட்ட சம்பவம் அப்பகுதியில் பெரும் சோகத்தை ஏற்படுத்தியுள்ளது.
சம்பவத்தின் பின்னணி:
தனியாமங்கலம் பகுதியைச் சேர்ந்த பெரியகருப்பன் என்பவரின் மகன் முத்துவேலன் (7), விளையாடுவதற்காக வீட்டை விட்டு வெளியேறியுள்ளார். நீண்ட நேரமாகியும் சிறுவன் வீடு திரும்பாததால், அதிர்ச்சியடைந்த பெற்றோர் இது குறித்து கீழவளவு காவல் நிலையத்தில் புகார் அளித்தனர். புகாரின் அடிப்படையில் காவல்துறையினர் தேடுதல் வேட்டையில் ஈடுபட்டு வந்தனர்.
காவல்துறை விசாரணை:
இந்நிலையில், இன்று சிறுவன் முத்துவேலன் சடலமாக மீட்கப்பட்டார். சிறுவனின் உயிரிழப்புக்கான காரணம் குறித்து கீழவளவு காவல்துறையினர் வழக்குப்பதிவு செய்து, பல்வேறு கோணங்களில் தீவிர விசாரணை மேற்கொண்டு வருகின்றனர். பிரேத பரிசோதனைக்கு பிறகே மரணத்திற்கான உண்மையான காரணம் தெரியவரும் என எதிர்பார்க்கப்படுகிறது.