நாமக்கல் சேலம் சாலையில் உள்ள 80 அடி சாலையில் அமைந்துள்ள கோழித்தீவனக் கிடங்கில் ஏற்பட்ட திடீர் தீ விபத்தில், சுமார் ரூ.5 லட்சம் மதிப்பிலான பொருட்கள் எரிந்து சேதமடைந்தன.
நாமக்கல் பதிநகரைச் சேர்ந்த கண்ணன் (50) என்பவர், கோழித்தீவன மூலப்பொருட்களை விற்பனை செய்து வருகிறார். இவரது கிடங்கிலிருந்து திடீரென கரும்புகை வெளியேறியதைக் கண்ட அப்பகுதி மக்கள், உடனடியாக நாமக்கல் தீயணைப்புத் துறையினருக்குத் தகவல் தெரிவித்தனர்.
சம்பவ இடத்திற்கு விரைந்து வந்த தீயணைப்பு வீரர்கள், நீண்ட நேரம் போராடி தீயை முழுமையாகக் கட்டுக்குள் கொண்டு வந்தனர். இந்த விபத்தில் தவிடு மூட்டைகள் உள்ளிட்ட சுமார் ரூ.5 லட்சம் மதிப்பிலான தீவனப் பொருட்கள் தீயில் கருகி சேதமடைந்தன. முதற்கட்ட விசாரணையில், மின் கசிவு காரணமாக இந்த தீ விபத்து ஏற்பட்டிருக்கலாம் என தீயணைப்புத் துறையினர் சந்தேகிக்கின்றனர்.