கரூரில் சுற்றுச்சூழல் விதிமுறைகளை மீறி அனுமதியின்றி செயல்பட்டு வந்த இரண்டு சாயப்பட்டறைகளை மாசுக்கட்டுப்பாட்டு வாரிய அதிகாரிகள் அதிரடியாக இடித்து அகற்றினர்.
தமிழகத்தில் நீர்நிலைகளைப் பாதுகாக்கும் நடவடிக்கையின் ஒரு பகுதியாக, கரூர் மாவட்ட ஆட்சியரின் உத்தரவின்பேரில் அமைக்கப்பட்ட ஒருங்கிணைப்புக் குழுவினர் தொழிற்சாலைகளில் தொடர் ஆய்வுகளை மேற்கொண்டு வருகின்றனர். கடந்த 9-ஆம் தேதி அமராவதி ஆற்றில் சுத்திகரிக்கப்படாத கழிவுநீர் கலப்பதாக எழுந்த புகாரைத் தொடர்ந்து, மாசுக்கட்டுப்பாட்டு வாரிய அதிகாரிகள் தீவிர விசாரணையில் ஈடுபட்டனர்.
இதன் தொடர்ச்சியாக, கரூர் மாநகராட்சிக்கு உட்பட்ட மாவடியான் கோவில் தெரு மற்றும் பாலம்மாள்புரம் பகுதிகளில் அனுமதியின்றி சாயப்பட்டறைகள் இயங்கி வருவது கண்டறியப்பட்டது. இதனைத் தொடர்ந்து, சார் ஆட்சியர் வெங்கடேசன் மற்றும் மாவட்ட சுற்றுச்சூழல் பொறியாளர் தொல்காப்பியன் தலைமையிலான அதிகாரிகள் சம்பவ இடத்திற்குச் சென்று, அந்த இரண்டு சாயப்பட்டறைகளையும் இடித்து அகற்றினர்.
எச்சரிக்கை:
சுற்றுச்சூழலுக்குப் பாதிப்பு ஏற்படுத்தும் வகையில் அனுமதியின்றி செயல்படும் தொழிற்சாலைகள் மீது சட்டப்படி கடுமையான நடவடிக்கை எடுக்கப்படும் என மாவட்ட நிர்வாகம் எச்சரித்துள்ளது.